ការវិនិយោគបៃតងនាំមកនូវកំណើន៖ ការរកឃើញសំខាន់ៗនៃសេណារីយ៉ូឧស្សាហកម្មបៃតងរបស់ GGGI សម្រាប់កម្ពុជា

វិស័យឧស្សាហកម្មនៅកម្ពុជា គឺជាក្បាលម៉ាស៊ីនជំរុញកំណើនសេដ្ឋកិច្ច ការបង្កើតការងារ និងការកាត់បន្ថយភាពក្រីក្រ។ ចំណែករបស់វិស័យនេះក្នុងផលិតផលក្នុងស្រុកសរុប (GDP) បានកើនឡើងពី ១៧% ក្នុងឆ្នាំ១៩៩៨ ដល់ ២៩% ក្នុងឆ្នាំ២០១៦។ ដើម្បីឱ្យកម្ពុជាបន្តធ្វើពិពិធកម្ម និងពង្រីកសេដ្ឋកិច្ចរបស់ខ្លួន ត្រូវតែស្វែងរកវិធីថ្មីៗដើម្បីបង្កើនផលិតភាព និងឈានទៅដល់ទីផ្សារដែលមានតម្លៃខ្ពស់។ នៅក្នុង គោលនយោបាយអភិវឌ្ឍន៍វិស័យឧស្សាហកម្ម ២០១៥-២០២៥ រាជរដ្ឋាភិបាលកម្ពុជាបានកំណត់ទិសដៅធ្វើទំនើបកម្មរចនាសម្ព័ន្ធឧស្សាហកម្មរបស់កម្ពុជាពីឧស្សាហកម្មពឹងផ្អែកលើពលកម្ម ទៅជាឧស្សាហកម្មផ្អែកលើជំនាញ ដោយធ្វើសមាហរណកម្មអាជីវកម្មក្នុងស្រុកទៅក្នុងខ្សែសង្វាក់ផ្គត់ផ្គង់សកល និងតំបន់។ ការធ្វើគំរូសេដ្ឋកិច្ចរបស់ GGGI បានអះអាងថា ការធ្វើឱ្យវិស័យឧស្សាហកម្មមានភាពបៃតង គឺជាមធ្យោបាយមួយក្នុងការសម្រេចបាននូវគោលដៅនេះ៖ ការវិនិយោគលើបច្ចេកវិទ្យាដែលប្រើប្រាស់ធនធានប្រកបដោយប្រសិទ្ធភាព អាចលើកកម្ពស់កំណើនសេដ្ឋកិច្ច ខណៈពេលដែលផ្តល់ផលប្រយោជន៍ដល់សង្គម និងបរិស្ថាន។