របាយការណ៍ស្តីពីការតាមដាននិងវាយតម្លៃលើការបោះឆ្នោតជ្រើសតាំងតំណាងរាស្រ្តឆ្នាំ២០០៨

របាយការណ៍នេះ មានមូលដ្ឋានចេញពីការតាមដាននិងវាយតម្លៃរបស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ( ខុមហ្វ្រែល) លើដំណើរការរៀបចំនិងការប្រព្រឹត្តទៅនៃការបោះឆ្នោតជ្រើសតាំងតំណាងរាស្រ្តឆ្នាំ២០០៨ សម្រាប់នីតិកាលទី៤ នៃរដ្ឋសភា នៅ១៥ ខេត្ត-ក្រុង ទូទាំងប្រទេសកម្ពុជា។ អ្នកសង្កេតការណ៍សម្រាប់រយៈពេលខ្លីនិងវែង ប្រមាណជា ១០,០០០នាក់ និងបុគ្គលិក/អ្នកស្ម័គ្រចិត្តរាប់សន្លឹកឆ្នោតភ្លាមៗ ១,៣១៩នាក់ ត្រូវបានបណ្តុះបណ្តាល និងដាក់ពង្រាយនៅតាមគោលដៅ។ ខណៈដែលចំនួនករណីអំពើហិង្សារធ្លាក់ចុះ ការប្រើប្រាស់ប្រព័ន្ធផ្សព្វផ្សាយប្រសើរជាងមុន និងការយល់ដឹងកាន់តែប្រសើរឡើងលើសិទ្ធិ និងករណីកិច្ចរបស់អ្នកបោះឆ្នោត ដោយប្រជាពលរដ្ឋកម្ពុជា ត្រូវបានគូសបញ្ជាក់នៅក្នុងរបាយការណ៍ កត្តាព្រួយបារម្ភខ្លះនៅតែមាន៖ ការចូលរួមសកម្មរបស់មន្រ្តីរាជការ កងកម្លាំង និង អាជ្ញាធររដ្ឋ ក្នុងការគាំទ្រយុទ្ធនាការនៃការបោះឆ្នោត សម្រាប់គណបក្សប្រជាជនកម្ពុជា ការប្រើប្រាស់ធនធានរដ្ឋជាប្រយោជន៍ដល់គណបក្សកាន់អំណាច និងភាពជាតំណាងទាបគួរបារម្ភរបស់ស្រ្តី នៅក្នុងរដ្ឋសភាថ្មី។