ဤစာတမ်း၏ရည်ရွယ်ချက်သည် ကမ္ဘာ့မြေယာနှင့်သဘာဝသယံဇာတများကို စီမံခန့်ခွဲ ရန် ဓလေ့ထုံးတမ်း ဆိုင်ရာ အခွင့်အရေးမူဘောင်ကိုအသုံးပြု၍ ကမ္ဘာတစ်ဝှမ်းရှိ တိုင်းရငး်သားလူမျိုးစုများနှင့် ဌာနေတိုင်းရင်းသားများ ရင် ဆိုင်နေရသော ပြသနာများနှင့် လက်ရှိအခြေအနေများကို အကျဉ်းချုပ်တင်ပြရန် ဖြစ်သည်။ အဆိုပါအတွေ့အကြုံ များအားဖော်ပြခြင်းဖြင့် မြန်မာနိုင်ငံရှိ တိုင်းရင်းသားလူမျိုးစုများအနေဖြင့် ဤ အသွင်ကူးပြောင်းရေးကာလ အတွင်း ၎င်းတို့၏မြေယာများအားထိန်းချုပ်ရန် ၎င်းတို့ကိုယ်တိုင် ကြိုးစားရုန်းကန်နေရသော အခြေအနေများနှင့် ဖြစ်နိုင်ခြေများကို ပိုမိုနားလည်နိုင်မည်ဖြစ်သည်။ အခြားနိုင်ငံများ၏ဓလေ့ထုံးတမ်းမြေယာစီမံခန့်ခွဲမှုပုံစံများကို ၎င်းတို့၏ တရားဥပဒေစိုးမိုးရေးအတွင်း၌ မည်သို့ ထည့်သွင်းစဉ်းစားကြသည်ကို ဆန်းစစ်ကြည့်ရာတွင် မြန်မာနိုင်ငံ၌လည်း တိုင်းရင်းသားလူမျိုးစုများသည် တရားမျှတ၍ မြေယာစီမံခန့်ခွဲမှုစနစ်တွင်ပါဝင်မှုများရရှိရန် အတွက် ၎င်း တို့၏ကိုယ်ပိုင် မဟာဗျူဟာများကို ပိုမိုထိရောက်စွာ ဆွေးနွေးငြင်းခုံနိုင်ကြလိမ့်မည်ဟု မျှော်လင့်ထားခြင်းဖြစ်သည်။