ការប្រែក្លាយវិបត្តិទៅជាឱកាស៖ កម្មវិធីអន្តរាគមន៍សម្រាប់ការវិលត្រលប់របស់ពលករចំណាកស្រុកកម្ពុជា

ប្រទេសកម្ពុជាកំពុងស្ថិតនៅត្រង់ចំណុចរបត់មួយដ៏សំខាន់។ ចាប់តាំងពីខែកក្កដា ឆ្នាំ២០២៥ បន្ទាប់ពីមានជម្លោះព្រំដែនជាមួយប្រទេសថៃ ពលករខ្មែរ ប្រមាណ ៩១ម៉ឺននាក់ដែលស្មើរនឹង ១០ % នៃកម្លាំំងពលកម្មជាតិ បានវិលត្រលប់មក ប្រទេសវិញ។ ពលករ ទាំងនេះ គឺជាឆ្អឹងខ្នងទ្រទ្រង់សេដ្ឋកិច្ចនៅទីជនបទ និងជីវភាពរស់នៅរបស់ប្រជាពលរដ្ឋ រាប់លានគ្រួសារ។ ការវិលត្រឡប់មកវិញភ្លាមៗនេះ បានធ្វើឲ្យសហគមន៍ប្រឈមនឹងការបាត់បង់ការងារ ការផ្ញើប្រាក់មកផ្ទះ និងស្ថិរភាពសង្គមក្នុងពេលដំណាលគ្នា។ កិច្ចការបន្ទាន់បំផុត គឺត្រូវធ្វើឲ្យគ្រួសារពលករចំណាកស្រុកមានស្ថិរភាព ទប់ស្កាត់កំណើនភាពក្រីក្រ និងធ្វើសមាហរណកម្មពលករដែលវិលត្រលប់មកវិញ ទៅក្នុងជីវភាពរស់នៅក្នុងសហគមន៍ឲ្យបានឆាប់រហ័ស។ វិទ្យាស្ថាន CDRI និង វិទ្យាស្ថាន ERIA បានសហការចងក្រងនូវសង្ខេបសម្រាប់គោលនយោបាយនេះ ដើម្បីធ្វើជាផែនទីបង្ហាញផ្លូវមួយ​ដោយផ្អែកលើការពិភាក្សាជាមួយ អ្នកតំណាងមកពីក្រសួងមន្ទីរ និងទីភ្នាក់ងារអន្តរជាតិសរុបចំនួន ១៩ ដើម្បីសំយោគការឆ្លើយតប តម្រូវការ និងគំនិតដែលមានស្រាប់របស់រាជរដ្ឋាភិបាលដែលអាចរួមចំណែកដល់ដំណោះស្រាយជាវិជ្ជមាន ចំពោះបញ្ហានាពេលបច្ចុប្បន្ន ទាក់ទងនឹងការវិលត្រលប់មកវិញរបស់ពលករចំណាកស្រុកកម្ពុជា។